อจิรํ วตยํ กาโย, ปถวิํ อธิเสสฺสติ;

ฉุทฺโธ อเปตวิญฺญาโณ, นิรตฺถํว กลิงฺครํฯ

[42]

ทิโส ทิสํ ยํ ตํ กยิรา, เวรี วา ปน เวรินํ;

มิจฺฉาปณิหิตํ จิตฺตํ, ปาปิโย [ปาปิยํ (?)] นํ ตโต กเรฯ

[43]

น ตํ มาตา ปิตา กยิรา, อญฺเญ วาปิ จ ญาตกา;

สมฺมาปณิหิตํ จิตฺตํ, เสยฺยโส นํ ตโต กเรฯ

จิตฺตวคฺโค ตติโย นิฏฺฐิโตฯ

4. ปุปฺผวคฺโค

[44]

โก อิมํ [โกมํ (ก.)] ปถวิํ วิเจสฺสติ [วิเชสฺสติ (สี. สฺยา. ปี.)], ยมโลกญฺจ อิมํ สเทวกํ;

โก ธมฺมปทํ สุเทสิตํ, กุสโล ปุปฺผมิว ปเจสฺสติ [ปุปฺผมิวปฺปเจสฺสติ (ก.)]ฯ

[45]

เสโข ปถวิํ วิเจสฺสติ, ยมโลกญฺจ อิมํ สเทวกํ;

เสโข ธมฺมปทํ สุเทสิตํ, กุสโล ปุปฺผมิว ปเจสฺสติฯ

[46]

เผณูปมํ กายมิมํ วิทิตฺวา, มรีจิธมฺมํ อภิสมฺพุธาโน;

เฉตฺวาน มารสฺส ปปุปฺผกานิ [สปุปฺผกานิ (ฏีกา)], อทสฺสนํ มจฺจุราชสฺส คจฺเฉฯ

[47]

ปุปฺผานิ เหว ปจินนฺตํ, พฺยาสตฺตมนสํ [พฺยาสตฺตมานสํ (ก.)] นรํ;

สุตฺตํ คามํ มโหโฆว, มจฺจุ อาทาย คจฺฉติฯ

[48]

ปุปฺผานิ เหว ปจินนฺตํ, พฺยาสตฺตมนสํ นรํ;

อติตฺตญฺเญว กาเมสุ, อนฺตโก กุรุเต วสํฯ

[49]

ยถาปิ ภมโร ปุปฺผํ, วณฺณคนฺธมเหฐยํ [วณฺณคนฺธมโปฐยํ (ก.)];

ปเลติ รสมาทาย, เอวํ คาเม มุนี จเรฯ

[50]

น ปเรสํ วิโลมานิ, น ปเรสํ กตากตํ;

อตฺตโนว อเวกฺเขยฺย, กตานิ อกตานิ จฯ

[51]

ยถาปิ รุจิรํ ปุปฺผํ, วณฺณวนฺตํ อคนฺธกํ;

เอวํ สุภาสิตา วาจา, อผลา โหติ อกุพฺพโตฯ

[52]

ยถาปิ รุจิรํ ปุปฺผํ, วณฺณวนฺตํ สุคนฺธกํ [สคนฺธกํ (สี. สฺยา. กํ. ปี.)];

เอวํ สุภาสิตา วาจา, สผลา โหติ กุพฺพโต [สกุพฺพโต (สี. ปี.), ปกุพฺพโต (สี. อฏฺฐ.), สุกุพฺพโต (สฺยา. กํ.)]ฯ

[53]

ยถาปิ ปุปฺผราสิมฺหา, กยิรา มาลาคุเณ พหู;

เอวํ ชาเตน มจฺเจน, กตฺตพฺพํ กุสลํ พหุํฯ

[54]

น ปุปฺผคนฺโธ ปฏิวาตเมติ, น จนฺทนํ ตครมลฺลิกา [ตครมลฺลิกา (สี. สฺยา. กํ. ปี.)];

สตญฺจ คนฺโธ ปฏิวาตเมติ, สพฺพา ทิสา สปฺปุริโส ปวายติฯ

[55]

จนฺทนํ ตครํ วาปิ, อุปฺปลํ อถ วสฺสิกี;

เอเตสํ คนฺธชาตานํ, สีลคนฺโธ อนุตฺตโรฯ

[56]

อปฺปมตฺโต อยํ คนฺโธ, ยฺวายํ ตครจนฺทนํ [ยายํ ตครจนฺทนี (สี. สฺยา. กํ. ปี.)];

โย จ สีลวตํ คนฺโธ, วาติ เทเวสุ อุตฺตโมฯ

[57]

เตสํ สมฺปนฺนสีลานํ, อปฺปมาทวิหารินํ;

สมฺมทญฺญา วิมุตฺตานํ, มาโร มคฺคํ น วินฺทติฯ

[58]

ยถา สงฺการฐานสฺมิํ [สงฺการธานสฺมิํ (สี. สฺยา. กํ. ปี.)], อุชฺฌิตสฺมิํ มหาปเถ;

ปทุมํ ตตฺถ ชาเยถ, สุจิคนฺธํ มโนรมํฯ

[59]

เอวํ สงฺการภูเตสุ, อนฺธภูเต [อนฺธีภูเต (ก.)] ปุถุชฺชเน;

อติโรจติ ปญฺญาย, สมฺมาสมฺพุทฺธสาวโกฯ

ปุปฺผวคฺโค จตุตฺโถ นิฏฺฐิโตฯ

5. พาลวคฺโค

[60]

ทีฆา ชาครโต รตฺติ, ทีฆํ สนฺตสฺส โยชนํ;

ทีโฆ พาลานํ สํสาโร, สทฺธมฺมํ อวิชานตํฯ

[61]

จรญฺเจ นาธิคจฺเฉยฺย, เสยฺยํ สทิสมตฺตโน;

เอกจริยํ [เอกจริยํ (ก.)] ทฬฺหํ กยิรา, นตฺถิ พาเล สหายตาฯ

[62]

ปุตฺตา มตฺถิ ธนมฺมตฺถิ [ปุตฺตมตฺถิ ธนมตฺถิ (ก.)], อิติ พาโล วิหญฺญติ;

อตฺตา หิ [อตฺตาปิ (?)] อตฺตโน นตฺถิ, กุโต ปุตฺตา กุโต ธนํฯ

[63]

โย พาโล มญฺญติ พาลฺยํ, ปณฺฑิโต วาปิ เตน โส;

พาโล จ ปณฺฑิตมานี, ส เว ‘‘พาโล’’ติ วุจฺจติฯ

[64]

ยาวชีวมฺปิ เจ พาโล, ปณฺฑิตํ ปยิรุปาสติ;

น โส ธมฺมํ วิชานาติ, ทพฺพี สูปรสํ ยถาฯ

[65]

มุหุตฺตมปิ เจ วิญฺญู, ปณฺฑิตํ ปยิรุปาสติ;

ขิปฺปํ ธมฺมํ วิชานาติ, ชิวฺหา สูปรสํ ยถาฯ

[66]

จรนฺติ พาลา ทุมฺเมธา, อมิตฺเตเนว อตฺตนา;

กโรนฺตา ปาปกํ กมฺมํ, ยํ โหติ กฏุกปฺผลํฯ

[67]